امریکا قوشمه ایالتلری نینگ پینسیلوانیا ایالتیده اۉزبېک تیلی ملي کونی طنطنه‌لی نشانلندی
امریکا قوشمه ایالتلری نینگ پینسیلوانیا ایالتیده اۉزبېک تیلی ملي کونی طنطنه‌لی نشانلندی!امریکا قوشمه ایالتلری نینگ پینسیلوانیا ایالتیده‌گی فیلادیلفيا شهریده 29-میزان — اۉزبېک تیلی م...
امریکا قوشمه ایالتلری نینگ پینسیلوانیا ایالتیده اۉزبېک تیلی ملي کونی طنطنه‌لی نشانلندی!
امریکا قوشمه ایالتلری نینگ پینسیلوانیا ایالتیده‌گی فیلادیلفيا شهریده 29-میزان — اۉزبېک تیلی ملي کونی مناسبتی بیلن مدني-ادبي تدبیر اۉتکزیلدی. تېمور مدني و اجتماعي اویوشمه‌سی تشبثی بیلن تشکیل اېتیلگن اوشبو تدبیرده امریکاده استقامت قیله‌یاتگن افغانستانلیک مدنیت نماینده‌لری، صنعتکارلر، شاعرلر، عیاللر همده جماعه فعاللری اشتراک اېتدی.
تدبیر اۉزبېک تیلینی اسره‌ب-اوه‌یلش، افغانستان اۉزبېکلری نینگ مدني و ادبي میراثینی تنیشتیریش، اجتماعي بیردملیکنی مستحکملش همده مدني قدریتلرنی کېله‌جک اولادلرگه یېتکزیش مقصدیده تشکیل اېتیلدی.
تدبیر دستوریدن استاذ و پروفیسورلر نینگ معروضه‌لری، شعرلر اۉقیلیشی، موسیقی اجرالری، باله‌لر اوچون مخصوص دستورلر، شونینگدېک، اۉزبېک ملي طعاملری و کییم-کېچکلری کۉرگزمه‌سی ا‌ۉرین آلدی.
تدبیر نینگ معروضه‌لر قِسمیده ایندینا بیلیم یورتی‌نینگ پروفیسوری، دوکتور نظیف شهراني افغانستان تورکي خلقلری، خصوصاً، اۉزبېک و تورکمنلر نینگ تاریخی و موقعی، اۉزبېک تیلی کونینی نشانلش نینگ اهمیتی همده اونینگ تاریخي و مدني اۉزلیکنی سقلشده‌گی اۉرنی حقیده سۉز یوریتدی. او موضوع دایره‌سیده تاریخي ایلدیزلرنی انگلش، تیل و مدني میراثنی اسره‌ب-اوه‌یلش همده اونی بوگونگی و کېله‌جک اولادلرگه یېتکزیش مهم‌لیگینی باتفصیل تأکیدله‌دی.
شونینگدېک، افغانستان نینگ تنیقلی صنعتکاری فرهاد دریا هم تدبیرده اشتراک اېتیب، معروضه و بدیعي دستورلرده اۉز حصه‌سینی قۉشدی. او صنعت و موسیقی نینگ انسانلرنی بیرلشتیریشده‌گی اۉرنی، تیل و مدني خیلمه-خیللیککه حرمت بیلن قره‌ش همده اجتماعي بیردملیکنی مستحکملش مهم‌لیگینی تأکیدله‌دی.
شعریت هم محفل نینگ مهم و یارقین قِسملریدن بیری بۉلدی. عیاللر تامانیدن شعرلر نینگ افاده‌لی اۉقیلیشی اۉزبېک تیلی نینگ گۉزللیگی و بایلیگینی نمایان اېتدی. شونینگدېک، شعر و ادبیات نینگ آنه تیلینی اسره‌ش، مدني قدریتلرنی اولاددن اولادگه یېتکزیش همده خلق نینگ خاطره‌لری و عنعنه‌لرینی سه‌قلب قالیشده‌گی اۉرنی تأکیدلندی.
تدبیر نینگ علیحده و تأثیرچن قِسملریدن بیری باله‌لر نینگ اشتراکی همده اولر تامانیدن تیارلنگن ادبي چیقیشلر بۉلدی. اونده باله‌لر اۉزبېک تیلی ملي کونی مناسبتی بیلن تبریکلر و قیسقه متنلر تقدیم اېتدیلر، اَیریملری اېسه شعرلر اۉقیدیلر. اوشبو قِسم یاش اولادنی آنه تیلینی اۉرگنیش و اوندن فایده‌لنیشگه رغبتلنتیریش، باله‌لر نینگ اۉزیگه بۉلگن ایشانچینی مستحکملش همده اولرنی عایله‌لری نینگ مدني میراثی بیلن تنیشتیریش مقصدیده تشکیل اېتیلدی. شونینگدېک، چیقیشلرده برچه تیللرگه حرمت بیلن مناسبتده بۉلیش، تیل و مدني خیلمه-خیللیکنی قدرلش همده تورلی جماعه‌لر اۉرته‌سیده‌گی اۉزارا انگلشوونی کوچه‌یتیریش مهم‌لیگی تأکیدلندی.
موسیقي دستورده فرهاد دریا، خیر محمد چاووش و سید کبیر کمال کبی تنیقلی صنعتکارلر اشتراک اېتیب، اۉزلری نینگ دلبر کوی-قۉشیقلری بیلن تدبیرگه کۉترینکی کیفیت بغیشله‌دیلر.
شونینگدېک، تدبیر دایره‌سیده اۉزبېک ملي طعاملری و ملي کییملر کۉرگزمه‌سی تشکیل اېتیلدی.
تدبیر دوامیده مدني، ادبي و اجتماعي فعالیتلرنی رواجلنتیریشگه مناسب حصه قۉشگن بیر قطار صنعتکارلر، همکارلر همده تېمور مدني و اجتماعي اویوشمه‌سی نینگ فعال اعضالری تشبث‌کارنامه و فخري یارلیقلر بیلن تقدیرلندی.
تدبیر یکونیده اشتراکچیلرگه عنعنوي اۉزبېک طعاملری تارتیلدی. شوندن سۉنگ اشتراکچیلر اۉزارا صحبتلشیب، فکر المشدیلر.
تېمور مدني و اجتماعي اویوشمه‌سی اوشبو تدبیرنی اۉتکزیش آرقه‌لی اۉزبېک تیلینی اسره‌ب-اوه‌یلش، افغانستان اۉزبېکلری نینگ مدني و ادبي میراثینی سه‌قلش همده یاش اولادنی اۉز مدني اۉزلیگینی انگلش و قدرلشگه رغبتلنتیریش مهم‌لیگینی ینه بیر بار تأکیدله‌دی.
تېمور مدني و اجتماعي اویوشمه‌سی تدبیرده اشتراک اېتگن برچه معروضه‌چیلر، صنعتکارلر، شاعرلر، عایله‌لر، اشتراکچیلر و همکارلرگه صمیمي منّتدارلیک بیلدیره‌دی همده عمومي مدني میراثنی اسره‌ش و اولادلر اۉرته‌سیده‌گی علاقه‌لرنی مستحکملش یۉلیده مدني، ادبي و اجتماعي فعالیتلرینی دوام اېتتیریشگه صادقلیگینی ینه بیر بار بیلدیره‌دی.
تېمور اویوشمه‌سی مطبوعات جماعه‌سی